احلى ابوذيات

**دموع حبيبتي** · 01-02-2009

اول ابوذيه اهديها للغاليه ((------ ل ------)) يارب تقراها

حبيبتي انت والج بالروح منصب
وعلى فركاج دمعي منصب
عسى موتي قريب وقبري من صب
ولا اسمع خبر عنك اذيه

هاي الابوذيات مهدات الى جميع الاعضاء

حلفت ما اكعد ابفيك ونخلك
شلون دكول انت اخويه وانه اخ الك
لجيبن منخل الخوة وانخلك
واطلع كل اخو يكول شعليه

حلفت ما اكعد بمطعم ولا صاله
وشعجب هالناس مابيهم اصاله
اني اللي شفت راغب واصاله
علي جوهر يتفيك عليه

اني الجنت مثل ميل الساعه وميلان
وظربتي خط عدل مابيها ميلان
واني اللي لعبت للانتر وميلان
هوار الملا يتفيك عليه

كظيت الدهر ما فد يوم حنيت
واديه من دموع العين حنت
يايمه وداعتج هاليوم حنيت
وشلت نار الدمع بثنين اديه

مفارك الليالي سنين مرن
وعلي صاير لذيذ الزاد مرن
طفر ***ي على النقال من رن
لان حسيت روحي ادك عليه

انه الصياد وصادتني شبكتك
دخيل الله شكثر حلوة شبكتك
ادك عليك شو مشغوله شبكتك
اظن مغلق جهازك بس عليه

فزع طبع الصبر بينه منخوينه
ويا روحي جروحي منخوينه
اخوي العييد بحزني منخوينه
انخه اشلون وجفوفي بديه

شفت وسفه اعله البحر منحوت
وصرت شاخص حزن منضيم منحوت
اذا يونس عبرته اتصير منحوت
انا الطيب عبره يصير اليه

منومثلي تعب لجلك ودارة
وعاش بعيد عن اهلة ودارة
اريد اعرف منو لعب بعقلك ودارة
حبيبي شما يصير انت الية

أأمم بيها والجامع ورايه
وصفيت امشي وره الچانوا ورايه
نويت اهجم شلت سيفي ورايه
رماني بسهم عينه وطاح بيه

حبيبي اشغير اطباعك ودارك
تبعد منزلك عني ودارك
خايب تمنيت داري اكبال دارك
واشوفك كل صبح ومسية

العشك منه استراحينه وهدنه
واخذنه من الدمع راحة وهدنه
ياحلو الطول فك ياخه وهدنه
عجزنه من الهوى وناره سريه

اساس بعشرتي وياك صبيت
جنني الهوى وبالشوگ صبيت
اذا انت عليه دموع صبيت
عميت عيوني من فرگاك اليه

ايام الحلوه راحن منسى عدها
ويهنياله لامه من سعدها
حبيبتي چنت اروحلها منا انسى عندها
الروح والقلب اخذهن سويه

اضل صاحب سلوك وياك واسلاك
وعلى بابك اخلي حرس واسلاك
وشيطانك اذا فد يوم وس لاك
اگلك خاف الله وحن عليه

طحتلي بناس عگبك ..فطراني
نهر يابس وهجرك ..فطراني
صوتك وانة صايم ..فطراني
من اشوفن صورتك شيصير بية

يظن البيه لكن مات ظنه
اشعمل بيه انا افراگه ماتظنه
اخوي الناس گالت مات اظنه
شچذب الناس ودفنته بديه

اكوم إجلالا لحسنك واقف لك
واسجل ***ي ياخلي وقف لك
واحطك بي واقفلنه واقفلك
واطب بصدري واقفلكم عليه

تغيب الروح بغيابك واردها
كتاب جفاك من عندك وردها
روحي بفركتك يذبل وردها
شمس انت وتنور الدرب ليه

لو ردت الحبيب اتشوفه ينشــــــاف
وطيبلك جرح بضــــــــماده ينشـاف
اخبرك بل حبيب اشلون ينشـــــــاف
بس ضيف الاميل وهاي هيــــه

وحك رمضان وأشرافه وكتبه
عليك يهل دمع عيني وكتبه
انه شماريد أهم خطك واكتبه
شدهني جفاك من غصبن عليه

تعال اسمع ون النايات وون عود
يخويه امشي نرد للوطن ونعود
اذا باجر متت بالغربه ون عود
وتظل ابعيد عن ارض الوطيه

تلوج الروح ياأحبــابي وراكم
وعجاج الضعن سد عيني وراكَم
يدمرني الحلم بيكم وراكم
ويريت الحلم واليقــضه سويه.

وسط گلبي يظل طابع وسمهه
عسل صافي حلو مرهاوسمهه
صفيت متيه باسمي وسمهه
لان هيه النجم واني الثريه

احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية

ياااااااااااااارب تعجبكم ان شاء الله

تحياتي الكم ....

**لحظة حب** · 01-02-2009

عاشت الايادي على الاختيار الرائع

تحياتي لك

بأنتظار جديدك

عاشق الدموع · 01-02-2009

شكرا حبي الغالي دموع على هاي الكلمات الجميله
في غايت الروعه والجمال
عاشت ايدك وان شاء الله المزيد من الابداع
تحياتي لك
عاشق ******الدمـــــــــــــــوع

**مرسـ الغرام ـول** · 01-02-2009

وسط گلبي يظل طابع وسمهه
عسل صافي حلو مرهاوسمهه
صفيت متيه باسمي وسمهه
لان هيه النجم واني الثريه

يسلموووو عيوني دموع حبيبتي

كلش حلوووو عاشت ايدك ورده

** زنوبة ** · 01-02-2009

عاشت ايدج على ابوذيات الي تخبل
تقبل تحياتي ومروري
دمت بحفظ الرحمن

صابر الرباعي · 01-03-2009

عاشت الايادي الكتبت هذه الكلمات الرائعه تحياتي ننتظر المزيد

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)